Hutbah Idul Adha I Bahasa Madura

اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ، لَا إِلَهَ إِلَّا اللَّهُ وَاللَّهُ أَكْبَرُ، اللهُ أَكْبَرُ وَلِلَّهِ الْحَمْدُ،ـ الْحَمْدُ للهِ الَّذِيْ يَـخْلُقُ مَا يَشَاءُ وَيَـخْتَارُ، أَحْمَدُهُ سُبْحَانَهُ الْوَاحِدُ الْعَزِيْزُ الْغَفَّارُ، وَأَشْهَدُ أَنْ لَّا إلهَ إِلَّا اللهُ وَحْدَهُ لَا شَرِيْكَ لَهُ الجبار القهار، وَأَشْهَدُ أَنَّ سَيِّدَنَا مُحَمَّدًا عَبْدُهُ وَرَسُوْلُهُ قُدْوَةُ الْأَبْرَارِ، اللهم صَلِّ وَسَلِّمْ عَلَى سَيِّدِنَا مُحَمَّدٍن المختار، وَعَلَى آلِهِ الأطهار وَأصحابِهِ الأخيار، صَلَاةً دَائِمَةً مَّا تَعَاقَبَ اللَّيْلُ وَالنَّهَارُ. أَمَّا بَعْدُ، فَيَا إِخْوَةَ الْإِسْلَامِ أُوْصِيْكُمْ وَنَفْسِيْ بِتَقْوَى اللهِ عَزَّ وَجَلَّ الْقَائِلِ فِي مُحْكَمِ كِتَابِهِ: إِنَّا أَعْطَيْنَاكَ الْكَوْثَرَ، فَصَلِّ لِرَبِّكَ وَانْحَرْ، إِنَّ شَانِئَكَ هُوَ الْأَبْتَـرُ

Hadirin Jama’ah Idul Adha se moljeagi Alloh SWT,
e wektoh sepenuh barokah kintoh, kauleh kelaben panjenengan along-polong kanggui ngelaksanaagi shalat ‘Idul Adha. kauleh kelaben panjenengan ngelakoni ruku’ ben sujud minangkah bukteh perasaan taqwa kauleh kelaben panjenengan dek ngersaepon alloh SWT.

Kauleh kelaben panjenengan ngagungagi Alloh SWT, klaben maos becaan takbir, tahlil ben tahmid minangkah pernyataan ben pengakuan atas agung ben molje-epon Alloh SWT. Takbir se kauleh kelaben panjenengan becah benni guncoman sekedar agulinnah bibir tanpa arteh. Ananging merupakan pengakuan ben keyakinan edelem ateh bahwa kauleh kelaben panjenengan seonggunah mahluk se sanget lemmah, krn sedejennah kekuatan ben keputusan gun coman geduennah Alloh SWT

Melalui mimber panekah beden kauleh ngajek dek beden kauleh dibik husus-epon ben dek para hadirin para rabu semoljeh umum-epon: Nyarah tambahin klaben sekuat tenaga ollenah kauleh kelaben panjenengan alelakon taqwa dek ngersaepon alloh swt. Karena taqwa minangka deddih pondasi deri kontruksi bangunan amal ubudiyah kauleh kelaben panjenengan, sae otabeh bunten amal, istiqomah otabeh bunten ubudiyah bisa etengalin derih kadar taqwaepon kauleh kelaben panjenengan. Bahkan alloh SWT anilai moljeh otabeh bunten sittung kebuleh enilai derih kadar taqwa-epon, akadih debu-epon [إنَّ أَكْرَمَكُمْ عِنْدَاللهِ أتْقَكُمْ] secak medureh-epon “Seonggunnah sepaling moljeh diantara sampian kabbih monggunah alloh enggi kakdintoh oreng sepaling taqwa”

Hadirin Jama’ah Idul Adha se moljeagi Alloh SWT,
nyarah momentum idul adha panekah deddiagi jelen kanggui metawaddu' abek kauleh kelaben panjenengan dek ngersa-epon Alloh Se Maha agung. Bueng pajeuh sefat angkuh, sombong, ujub, ereh, hasud, congkak ben sefat2 sededdih penyaketah ateh laenepon, karnah sefat2 panekah bisa majeuh kauleh kelaben panjenengan dari rahmat Alloh SWT. mejeuh deri syareatepon gusteh kanjeng nabi Muhammad ben jugen bisa merosak hubungan antara tetanggeh, tretan, kancah

Hadirin Jama’ah Idul Adha se emoljeagi Alloh SWT,
Idul adha enyamain "hari Raya Haji”, hal kintoh karna bulen pelaksanaan idul adha abereng klaben bulen kaum muslimin nglakonih ibedeh haji, sedejeh jamaah haji lakek, binik, tuwah ngodeh derih seluruh penjuru bumih tanpa terkecuali nganggui pakaian serba pote, se ekocak pakaian ihram, hal kintoh minangkah lambang persamaan akidah ben pandangan hidup ummat islam, agedui tatanan nilai sepadeh. lok bisa ebideagi antara sittung ben sittungah, sedejennah aromassah sederajat. padeh mesemak taqorrub dek ngersaepon alloh Se Maha kobesah, areng- sareng ngelakoni rukun haji. krn bulen idul adha kintoh jugen ngepasen dek bulen pelaksanaan ibedeh haji, makah hari raya idul adha jugen esebut hari raya haji.

Hadirin Jama’ah Idul Adha se moljeagi Alloh SWT
selaen Idul Adha enyamain hari raya haji, jugen enyamaen “Idul Qurban”, hal kintoh tak lepas derih kisah nabiyulloh Ibrohim se-ngorbanagi potraepon Ismail karnah semata2 rassah taqwa ben taat dek perentaepon Alloh SWT, lelakon kintoh ngantos mangken deddih syareatepon ummat Muhammad enggi kakdintoh setiap ba'da sholat Ied tanggel 10 ngantos asar tanggel 13 Dzulhijjah esonnatagi megili derennah hayawan qorban seampon memenuhi syarat, kanggui mesemmak taqorrub dek ngersaepon Alloh SWT, krn idul adha kintoh jugen ngepasen dek peristiwa pelaksanaan pengorbanennah nabiyulloh Ibrohim, makah hari raya idul adha jugen esebut idul qurban.

Hadirin Jama’ah Idul Adha se moljeagi Alloh SWT
Idul Adha, enyamaen jugen klaben “Idun Nahr” arteh epon dinah penyambelian. hal kintoh tak lepas derih kejadian tgl 10 dzulhijjah, enggi kakdintoh peristiwa seorang bapak se-asmaepon Ibrahim nyambelih potrannah dibik sesanget esayangin se-asmaepon Ismail, peristiwa kintoh ejelenagi sareng Nabiyulloh Ibrahim ben nabiyulloh Ismail klaben penuh ketaqwaan, keimanan ben kesabberen ngelaksanaagi perentannah Alloh, ananging nabi Ismail lok sedeh ebelli Alloh semaha belles agenteen penyembelihan klaben sittung mbik gibas derih soargeh, nengalen tragedi penyembelihan se lok toman bedeh bendingennah edelem sejarah umat manossah, berupa ketaatan nabi ibrohim sareng nabi ismail ajelenagi perenta-epon alloh, Malaikat Jibril nyakse-en sareng abektah embik kibasy, kagum ben takjub terus maos takbir “Allohu Akbar, Allohu Akbar, Allohu Akbar.” Nabi Ibrahim nyambung “Laailaha illahu Allohu Akbar.” Se terusepon e sambung sareng Nabi Ismail “Allohu Akbar Walillahil Hamdu.’ berdasarkan peristiwa kintolah idul adha jugen e sebut idun nahr.

Hadirin Jama’ah Idul Adha se moljeagi Alloh SWT
Hikmah se bisa epondut dari pelaksanaan shalat Idul Adha kepenekah enggi kakdintoh
1. bahwa hakikat manossah sittung ben laennah padeh. Se abideagi gun coman taqwa-epon.
2. Idul adha minangkah jelen kanggui ningkatagi nilai taqwa dek ngersaepon Alloh SWT
3. Sedejeh perintannah Alloh SWT, koduh elampagi klaben iman ben taqwa, karnah saonggunah, krn manfaat-epon madteh bekal abelih dek kauleh kelaben panjenengan dibik. Hal kintoh sesuai klaben debuepon Alloh SWT edelem Al-Qur'an

[مَنْ عَمِلَ صَالِحًا فَلِنَفْسِهِ وَ مَنْ أَسَاءَ فَعَلَيْهَا]

Paserah oreng ngelakonin amal begus, maka manfaatah bekal epebelih dek abek-eng dibik jugen sebelikkah paserah oreng alelakon klakoan tak begus maka mudorot/ bahayannah bekal epebelih dek abek-eng dibik
4. Penyembelihan hayawan korban minangkah simbol bahwa sedejeh nafso hayawan sebedeh eyabek kauleh kelaben panjenengan koduh epateh ben ebueng pejeuh.

Hadirin Jama’ah Idul Adha se moljeagi Alloh SWT,
Malar mander perayaan Idul Adha tahon manken, mampu menggugah ateh kauleh kelaben panjenengan untuk terus berusaha nikatagi taqwa, meberseh kotorennah ateh, ben rela berkorban demi kepentingan agama, bangsa ben negara amiin 3x ya robbal alamin.

أعُوْذُ بِاللهِ مِنَ الشَّيْطنِ الرَّجِيْمِ. بِسْمِ اللهِ الرَّحْمنِ الرَّحِيمِ. إِنَّا أَعْطَيْنَاكَ الْكَوْثَرَ فَصَلِّ لِرَبِّكَ وَانْحَرْ إِنَّ شَانِئَكَ هُوَ الْأَبْتَرُ بَارَكَ اللهُ لِي وَلَكُمْ فِي الْقُرْآنِ الْعَظِيْمِ. وَنَفَعَنِي وَاِيِّاكُمْ بما فيه مِنَ الآيَاتِ وَالذِّكْرِ الْحَكِيْمِ. وَتَقَبَّلْ مِنِّيْ وَمِنْكُمْ تِلاوَتَهُ اِنّهُ هُوَ السَّمِيْعُ اْلعَلِيْمُ. فَاسْتَغْفِرُوْا اِنَّهُ هُوَاْلغَفُوْرُ الرَّحِيْمُ